म. टा. खास प्रतिनिधी, मुंबईःउद्योगपती मुकेश अंबानी यांच्या अँटिलीया निवासस्थानाचा पत्ता विचारणारे मुंबई फिरण्यासाठी आलेले पर्यटक होते, अशी माहिती समोर आली आहे. ॲपवरील ज्या कॅबमधून त्यांचे मुंबई दर्शन सुरू होते त्या कॅबच्या चालकाने ते आपले मित्र असून गुजरातहून आले होते, अशी माहिती दिली आहे. पोलिसांनी त्याचा जबाब नोंदवला असून, त्याने सांगितलेल्या मित्रांचीही माहिती काढण्यात येणार आहे. आझाद मैदान येथे रस्त्याच्या कडेला उभ्या असलेल्या टॅक्सी चालकाला सोमवारी कॅबमधून आलेल्या दोघांनी मुकेश अंबानी यांच्या घरचा पत्ता विचारला. आधी ॲपववरून जा असे या चालकाने सांगितले. मात्र, कॅब चालकाने ॲप बंद असल्याचे सांगताच टॅक्सीचालकाने पत्ता सांगितला. त्यांचा वेष आणि बॅगा पाहून टॅक्सीचालकाला संशय आला आणि त्यातच नुकतेच अँटिलीया स्फोटक प्रकरण घडल्याने टॅक्सीचालकाने तत्काळ पोलिसांच्या नियंत्रण कक्षाला माहिती दिली. नियंत्रण कक्षातून कळल्यानंतर आझाद मैदान पोलिस ठाण्यात या चालकाकडून सविस्तर माहिती घेऊन पोलिसांनी तरुणांचा शोध सुरू केला. कॅबचा निळा रंग आणि क्रमांक यावरून पोलिसांनी चालक सुरेश पटेल याला शोधून काढले. कॅबमध्ये बसलेले दोघेही आपल्या परिचयातील असून गुजरातचे आहेत. ते फिरण्यासाठी मुंबईत आले होते. अशी माहिती पटेल याने दिली. सर्व पर्यटन स्थळे पाहून झाल्यावर त्यांना अँटिलीया पाहायचे होते. मला नीट रस्ता माहीत नव्हता, त्यात ॲप बंद होते म्हणून पत्ता विचारल्याचे पटेल याने सांगितले. त्याने दिलेल्या माहितीची पोलिस शहानिशा करीत असून गुजरातमधील त्या दोन तरुणांचीही माहिती घेण्यात येत आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3F6m18p
