सातारा : बिग बॉस मराठीच्या दुसऱ्या पर्वाचा विजेता शिव ठाकरेच्या गाडीचा अमरावतीत भीषण अपघात झाला आहे. आपल्या परिवारासोबत देवदर्शनावरुन परतताना अमरावतीच्या परतवाडा परिसराजवळ हा अपघात झाला आहे. यात शिव ठाकरे यात शिव ठाकरे थोडक्यात बचावला असल्याची माहिती आहे. मिळालेल्या माहितीनुसार, शिव ठाकरे आपल्या गाडीतून बहिण, जावई आणि आपल्या भाचीसोबत परतवाडा येथील गणपतीच्या मंदिरात दर्शनासाठी गेला होता. दर्शन घेतल्यानंतर घरी परत येत असताना शिव ठाकरेच्या गाडीला पाठीमागून दुसऱ्या गाडीने धडक दिली. ही धडक इतकी जोरदार होती की शिव ठाकरेची गाडी शेजारी असलेल्या शेतात ३०० फूट घसरत गेली. या अपघातात शिव ठाकरेच्या परिवाराला कोणतीही इजा झालेली नसली तरीही त्याच्या डोक्याला दुखापत झाली आहे. या अपघातानंतर शिव ठाकरेवर नजिकच्या रुग्णालयात उपचार करण्यात आले. या अपघाताबद्दल शिव ठाकरेने पोलिसांत तक्रार केली नाहीये. गाडी चालक आणि शिव ठाकरेने आपापसात समजून घेत हा मुद्दा संपवल्याचं सांगण्यात येत आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3kXDlob
