अहमदनगर: श्रीरामपूर तालुक्यातील येथे कारखाली सापडून कोंबडीचा मृत्यू झाला. त्यावरून कारचालक आणि कोंबडीच्या मालकांचे भांडण झाले. ते एवढे वाढले की आपसांत न मिटता थेट पोलिस ठाण्यापर्यंत गेले. दोघांनीही एकमेकांविरुद्ध फिर्यादी दिल्याने पोलिसांनी दोन्ही बाजूंच्या लोकांविरुद्ध गुन्हे दाखल केले. कोंबडी तर जीवानिशी गेली, पण त्यावरून लागलेली माणसांची झुंज पोलिस ठाण्यापर्यंत गेल्याने आता दोघांनाही चकरा मारण्याची वेळ आली आहे. श्रीरामपूर शहरालगत आठवाडी एकलहरे येथे ही घटना घडली. आठवाडी परिसरात कार (क्र. एमएच ०४ डीआर ५०८) जात असताना रस्त्यालगतच्या वस्तीवरील एक कोंबडी गाडीखाली आली. कारखाली चेंगरल्याने तिचा मृत्यू झाला. हे पाहून वस्तीवरील लोक धावून आले. कोंबडी मेल्याचा जाब चालकाला विचारू लागले. मात्र चालक गाडीच्या खाली उतरला नाही. त्यामुळे चिडलेल्या लोकांनी गाडीचे नुकसान केले. कारचालक त्याच परिसरातील आहे. वाद मिटण्याऐवजी वाढतच गेला. त्यामुळे कारचालक नवाब सय्यद (वय ३६ रा. आठवाडी, एकलहरे) यांनी श्रीरामपूर तालुका पोलिस ठाण्यात जाऊन फिर्याद दिली. रवींद्र भानुदास बर्डे, सपना रविंद्र बर्डे, मंगल नाना बर्डे (सर्व रा. आठवाडी, एकलहरे) यांनी आपल्याला शिवीगाळ केली, गाडीचे नुकसान केले, असे फिर्यादीत म्हटले आहे. त्यानुसार पोलिसांनी बर्डे कुटुंबातील तिघांविरूद्ध गुन्हा दाखल केला. त्यानंतर बर्डे यांच्याकडूनही फिर्याद देण्यात आली. रवींद्र भानुदास बर्डे यांनी ही फिर्याद दिली. सय्यद यांच्या गाडीखाली आमची कोंबडी मेली. त्याची विचारणा करण्यासाठी गेलो असता कारचालक नवाब सय्यद यांनी आपल्याला धमकी दिल्याचे आणि शिवीगाळ केल्याचे फिर्यादित म्हटले आहे. बर्डे यांच्या या फिर्यादीवरून पोलिसांनी कारचालक सय्यद याच्याविरूद्धही गुन्हा दाखल केला आहे. या घटनेत कोंबडीचा मृत्यू झाला. मात्र, त्यावरून माणसांचे भांडण पेटले. कोंबडी तर जीवानिशी गेली. आता गुन्हे दाखल झाल्याने दोन्ही बाजूच्या लोकांना पोलिस ठाणे आणि कोर्टाच्या चकरा मारण्याची वेळ आली आहे. हेही वाचा:
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3DoJtNL
