पोटात दुखते म्हणून महिलेने रुग्णालय गाठले अन् बसला सुखद धक्का...; नागपुरात घडली अनोखी घटना

एम्समध्ये अनोखे बाळंतपण म.टा. विशेष प्रतिनिधी, नागपूरः आपल्यालाही मूल व्हावे, अशी त्या दाम्पत्याची इच्छा होती. त्यासाठी त्यांनी भरपूर प्रयत्नही केले. मात्र, लग्नानंतर सुरुवातीच्या दिवसात एका अपघातात पाच महिन्यांचा गर्भ गमावलेल्या त्या दाम्पत्याला पुन्हा मूल होण्याची आशा उरली नव्हती. अचानक तब्बल सतरा वर्षांनी मातृत्व अगदी नकळत त्यांच्या दारी आले. पोटात दुखते म्हणून रुग्णालयात गेलेल्या महिलेला आपण नऊ महिन्यांचे गरोदर असल्याचे कळले आणि तिने एका बाळाला जन्मही दिला. हे अनोखे बाळंतपण झाले नागपूरच्या एम्समध्ये. आई-बाबा झालेल्या या दाम्पत्यातील महिलेचे वय ४७, तर पुरुषाचे वय ४८ आहे. या वयात त्यांना अनपेक्षितपणे आई-बाबा होण्याचे भाग्य लाभले आहे. विशेष म्हणजे, या महिलेला गंभीर मधुमेह आहे. याशिवाय, तिची बायपास शस्त्रक्रियाही झाली आहे. गेल्या अनेक वर्षांपासून मधुमेह आणि हृदयरोगावरील औषधांचे नियमित सेवन करीत असतानाही बाळावर मात्र कुठलाही विपरीत परिणाम झालेला नाही, हे आश्चर्यकारक आहे. ऑक्टोबरच्या शेवटच्या आठवड्यात ही महिला पोटात दुखत असल्याने एम्समध्ये उपचारासाठी गेली होती. त्यावे‌ळी सोनोग्राफी केली असता तिच्या पोटात नऊ महिने पूर्ण झालेले बाळ असल्याचे लक्षात आले. त्यामुळे डॉक्टरांनाही आश्चर्याचा धक्का बसला. कारण, आपण गरोदर आहोत, याची पुसटशीही कल्पना त्या महिलेला नव्हती. त्यामुळे गेल्या नऊ महिन्यांत तिने गरोदरपणात कुठली काळजी किंवा औषधेही घेतली नव्हती. गेल्या १७ वर्षांपासून या दाम्पत्याने आपल्याला मूल होईल, ही आशाच सोडली होती. त्यामुळे पोटात बाळ असल्याचे ऐकल्यावर त्यांना सुखद धक्का बसला. हे नेहमीपेक्षा वेगळे प्रकरण असल्याने एम्समधील डॉक्टरांनी महिलेची विशेष काळजी घेणे सुरू केले. बायपास किंवा मधुमेहाच्या औषधांचा गर्भातील बाळावर परिणाम होण्याची शक्यता असते. मात्र, या प्रकरणात असा कुठलाही अनुचित परिणाम बाळावर झालेला नव्हता. त्यामुळे हे दुर्मिळ प्रकरण असल्याचे एम्सच्या डॉक्टरांचे म्हणणे आहे. सुदृढ कन्यारत्न... अठरा वर्षांपूर्वी ही महिला पाच महिन्यांची गर्भवती असताना एका अपघातात तो गर्भ पडला होता. त्यानंतर तिला पुन्हा गर्भ राहिला नाही. त्यासाठी विविध औषधोपचार झाले, पण यश आले नव्हते. दरम्यानच्या काळात महिलेला हृदयविकाराचा त्रास सुरू झाला व चार वर्षांपूर्वी तिची बायपास शस्त्रक्रिया झाली. याशिवाय हायपरटेन्शन आणि मधुमेह यांच्या औषधांचे सेवन ती नियमित करते. डॉ. सुचिता मुंडले, डॉ. अनिता यादव, डॉ. नेहा गणगणे, हृदयरोगतज्ज्ञ डॉ. गुंजन घोडेस्वार हे डॉक्टरांचे पथक तिच्या प्रकृतीवर लक्ष ठेवून होते. सर्व तज्ज्ञ डॉक्टरांच्या देखरेखीत तिने ३.२ किलो वजनाच्या सुदृढ मुलीला जन्म दिला. वैद्यकशास्त्रात हे एक वेगळे प्रकरण मानले जात आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3kNzcTU