बीड : कितीही जनजागृती केली किंवा आरोपींना कडक शिक्षा दिली तरी देखील महिला अत्याचाराच्या घटना कमी होण्याचं नाव घेत नाहीयेत. बीडमध्ये असाच एक महिला अत्याचाराच्या धक्कादायक प्रकार समोर आला आहे. अल्पवयीन मुलीला लग्नाचं आमिष दाखवलं आणि तिच्यावर तब्बल पंधरा दिवस बलात्कार केल्याची खळबळजनक घटना बीडच्या परळीमध्ये समोर आली आहे. पंधरा दिवसानंतर आरोपी आणि पीडितेमध्ये वाद झाला आणि आरोपीने तिला बेदम मारहाण करत घाणेरड्या शब्दात शिवीगाळ केली. या घटनेनंतर पीडितेने थेट पोलीस ठाण्यात धाव घेतली आणि घडलेला प्रकार उघडकीस आला. या घटनेमुळे संपूर्ण परिसरात खळबळ उडाली असून पालकांमध्ये भीतीचं वातावरण आहे. पोलिसांनी दिलेल्या माहितीनुसार, आरोपी तरुणाविरुद्ध पॉस्को अंतर्गत अॅट्रॉसिटीचा गुन्हा दाखल करण्यात आला असून आरोपीची कसून चौकशी सुरू असल्याची माहिती देण्यात आली आहे. अधिक माहितीनुसार, जनक यादव असं आरोपीचं नाव आहे. तो परळी तालुक्यातल्या वडगाव इथला रहिवासी आहे. आरोपी जनकने एका अल्पवयीन मुलीला लग्नाचं आमिष दाखवलं आणि तिला आपल्या प्रेमाच्या जाळ्यात ओढलं. यानंतर 20 जूनला त्याने तिला पळवून नेत परळीतल्या एका लॉजवर नेलं. इतकच नाहीतर यानंतर त्याने तिला एका भाड्याच्या खोलीत ठेवलं. यावेळी तब्बल तब्बल पंधरा दिवस पीडित मुलीवर त्याने बलात्कार केले. पंधरा दिवसानंतर त्यांच्यामध्ये भांडणं झाली आणि त्यानंतर त्याने तिला मारहाण करत जातीवाचक शिवीगाळ केल्याचं समोर आलं. आरोपी आपल्याला फसवत असल्याचं पीडित अल्पवयीन मुलीच्या लक्षात येताच तिने नराधमाच्या तावडीतून पळ काढला आणि संभाजीनगर पोलीस स्टेशन घाठलं. पोलिसांना संपूर्ण प्रकार सांगत आरोपी विरोधात तक्रार दाखल केली आणि अॅट्रॉसिटीचा गुन्हा दाखल करण्यात आला. या प्रकरणी पोलिसांनी आरोपीला अटक केली असून पुढील तपास सुरू असल्याची माहिती पोलिसांनी दिली आहे. दरम्यान, या घटनेमुळे संपूर्ण परिसरात खळबळ उडाली असून अल्पवयीन मुलीवर अत्याचाराच्या घटना समोर येत असल्याचेही नागरिकांचे म्हणणे आहे. त्यामुळे समाजात आणखी जनजागृती करण्याची गरज आहे, तर तरुणांमध्ये पोलिसांची धाक बसण्याची देखील गरज आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3dYYwTF