नागपूर : उसनवारीच्या दोन हजारांसाठी एकाला कारने चिरडून ठार केल्याची खळबळजनक घटना गुरुवारी रात्री साडेनऊ वाजतादरम्यान नालवाडीच्या नागसेननगरात घडली. या घटनेमुळे संपूर्ण परिसरात खळबळ उडाली असून पोलीस तपास सुरू असल्याची माहिती आहे. मिळालेल्या माहितीनुसार, शंभू देवराव सोनगडे, असे या घटनेत जीव गमावलेल्याचे नाव आहे. वर्धा शहर पोलिसांनी आरोपीला ताब्यात घेऊन चौकशी सुरू केली आहे. शंभू यांची पत्नी जयमाला सोनगडे यांनी पल्लवी कोमणकर नामक महिलेकडून पाच हजार रुपये घेतले. या पैशांच्या वसुलीसाठी शैलेश कोमणकर व त्याचा सहकारी शैलेश येळणे हे शंभू यांच्याकडे आले. उसनवारीच्या पैशांची मागणी केल्याने जयमाला यांनी तीन हजार रुपये दिले. उर्वरित रक्कम काही दिवसांनी देणार, असे सांगितले. यावरून समाधान न झाल्याने वाद वाढला. हाणामारीही सुरू झाली. यानंतर शैलेश हा घराबाहेर आला. त्याने कार सुरू करून रस्त्यावर उभ्या असलेल्या शंभू यांच्यावर चढविली. गंभीर जखमी झाल्याने त्यांना सेवाग्राम रुग्णालयात दाखल करण्यात आले. पण, उपचारादरम्यान त्यांचा मृत्यू झाला. या घटनेची माहिती पोलिसांना मिळताच त्यांनी पुढील तपास सुरू केला असून शहर पोलिसांनी खुनाचा गुन्हा दाखल केला आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3lymc55
