पूरग्रस्तांसाठी आलेल्या मदतीतूनही भर म. टा. विशेष प्रतिनिधी, मुंबईः कोकणामध्ये पाणी ओसरले तसा झाडांवर अडकलेले प्लास्टिक, रस्त्याच्या कडेला साचलेल्या प्लास्टिकचा ढिगारा समोर येऊ लागला आहे. या प्लास्टिकच्या ढिगामुळे पाणी तुंबण्याची समस्या आणखी बिकट होईल का, अशी भीती निर्माण झाली आहे. यासोबतच पुन्हा एकदा प्लास्टिकच्या पाण्याच्या बाटल्या आणि मदतकार्यासाठी आलेल्या सामानाभोवती गुंडाळलेल्या प्लास्टिकचा ढीग वाढता होईल, अशी शक्यता आहे. यासाठी प्लास्टिकचा मर्यादित वापर आवश्यक असल्याचे मत व्यक्त होत आहे. महाडमध्ये मदतकार्यासाठी गेलेले स्वप्नील पाथरे यांनी कोकणाच्या सध्याच्या स्थितीचे वर्णन करत इतर कचऱ्यातून प्लास्टिक वेगळे करण्यासाठी कोणतीही यंत्रणा नसल्याने प्लास्टिकमिश्रित कचरा वाढत असल्याचे चित्र मांडले. मुंबईसारख्या शहरांमध्ये कचरावेचक गट इतर कचऱ्यापासून प्लास्टिक वेगळे करून त्यावर प्रक्रियेसाठी प्रयत्न करतात. मात्र अशी यंत्रणा कोकणामध्ये नसल्याने यातून आणखी वेगळ्या अडचणी निर्माण होतील अशी भीती त्यांनी व्यक्त केली. अनेक जण पाण्याच्या लहान बाटल्या पाठवत आहेत. या बाटल्या नंतर पुन्हा कचऱ्यात जातात. यापेक्षा पाण्याचे मोठे कॅन पाठवले तर कदाचित त्यातून प्लास्टिकच्या प्रमाणावर थोडे नियंत्रण येईल. तसेच हे कॅन नंतर पुनःचक्रीकरणासाठीही पाठवता येतील, असे मत त्यांनी व्यक्त केले. ही मदत खेड्यापाड्यांपर्यंत पोहोचताना भटक्या गाईगुरांच्या पोटामध्ये प्लास्टिक जाण्याचा धोकाही त्यांनी व्यक्त केला. यासंदर्भात स्थानिक प्रशासनही जागरुक नसल्याची खंत त्यांनी व्यक्त केली. चिपळूणमध्येही अशीच परिस्थिती आहे, अशी माहिती सध्या चिपळूणमध्ये मदतकार्य करत असलेले देवरुखच्या मातृमंदिर संस्थेचे मुख्य कार्यकारी अधिकारी सतीश शिर्के यांनी दिली. सध्या महाडमध्ये आलेल्या पाण्याच्या बाटल्या पुनःचक्रीकरणासाठी पनवेलला कशा पाठवायच्या यासंदर्भात विचारमंथन सुरू असून चिपळूणमध्येही लोकांनी या पाण्याच्या बाटल्या कचऱ्यात न टाकता एकत्र करून ठेवण्याचे आवाहन त्यांनी केले आहे. या बाटल्या कचऱ्यातून कचरा डेपोपर्यंत गेला तरी अनेक कचरा डेपो हे नदीकिनारी असल्याने हे सारे प्लास्टिक नदीत जाण्याची भीती आहे असे ते म्हणाले. स्थानिकांनाही आवाहन सध्या येणाऱ्या मदतीच्या एका किटसोबत किमान १३ ते १५ प्लास्टिकच्या पिशव्या येत आहेत. एका घरामध्ये सरासरी नऊ ते दहा किट जात असल्याचा अंदाज व्यक्त केला तरी हा कचराही मोठ्या प्रमाणात निर्माण होणार आहे. यामध्येही जिथे शक्य तिथे प्लास्टिकच्या पिशव्यांना आवर घालावा, असे प्रत्यक्ष घटनास्थळी कार्यरत कार्यकर्त्यांकडून सांगण्यात येत आहे. यासोबतच स्थानिकांनीही या पिशव्या कचऱ्यात न टाकता त्या एकत्र जमा करून मग कचरा गाड्यांकडे सोपवाव्यात किंवा यासाठी काही स्वयंसेवी संस्थांनी पुढाकार घ्यावा, असेही आवाहन करण्यात येत आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3zEngc1
