: कोल्हापूर जिल्हा सहकारी दूध उत्पादक संघाच्या (गोकुळ) अध्यक्षपदी विश्वास नारायण पाटील यांची निवड झाली आहे. शिरगाव येथील गोकुळ प्रकल्प येथे संचालक मंडळाच्या बैठकीत अध्यक्षपदी पाटील यांच्या निवडीवर शिक्कामोर्तब करण्यात आले. निवडणूक निर्णय अधिकारी वैभव नावडकर यांच्या अध्यक्षतेखाली निवड प्रक्रिया झाली. पाटील यांना तिसऱ्यांदा अध्यक्षपदाचा मान मिळाला आहे. पाटील हे तीन दशकाहून अधिक काळ संचालक म्हणून गोकुळशी निगडीत आहेत. दरम्यान, गोकुळ दूध संघाच्या निवडणुकीत सतेज उर्फ बंटी पाटील यांच्या नेतृत्वाखालील आघाडीने महाडिक गटाची अनेक वर्षांची सत्ता उलथून लावत एकहाती विजय मिळवला. त्यानंतर या दूध संघाच्या अध्यक्षपदाची माळ कुणाच्या गळ्यात पडणार याची मोठी उत्सुकता होती. या पदासाठी ज्येष्ठ संचालक अरुण डोंगळे व विश्वास नारायण पाटील यांची नावे चर्चेत होती. हे दोघेही निवडणुकीपूर्वी सत्ताधारी आघाडीतून विरोधी आघाडीत आले आहेत. या दोघांपैकी कोणाला संधी द्यायची याबाबत काल बैठक घेण्यात आली. मात्र नेत्यांच्या काल झालेल्या या बैठकीत निर्णय झाला नाही. त्यामुळे आज शुक्रवारी सकाळी पुन्हा बैठक झाली आणि अखेर पाटील यांच्या नावावर शिक्कामोर्तब करण्यात आले. दरम्यान, गोकुळ दूध संघावर विरोधकांनी आपली सत्ता प्रस्थापित केली. त्यानंतर पहिल्याच अध्यक्षांची आज निवड झाली. अध्यक्षपदी निवड होताच विश्वास नारायण पाटील यांच्या कार्यकर्त्यांनी मोठा जल्लोष केला.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3ycF8uQ
