मुंबई : राज्यात राजकीय हालचालींना वेग आला आहे. विरोधी पक्षनेते देवेंद्र फडणवीस यांनी राष्ट्रवादीचे सर्वेसर्वा शरद पवार यांची भेट घेतली आहे. यासंबंधी ट्वीट करत फडणवीसांनी या भेटीची माहिती दिली आहे. पवारांच्या निवासस्थानी जाऊन फडणवीसांनी नेमकी ही भेट कोणत्या कारणासाठी घेतली यावर आता राजकीय चर्चांना उधाण आलं आहे. खरंतर, काही वेळाआधीच फडणवीसांनी पत्रकार परिषद घेत आरक्षणाच्या मुद्द्यावरून ठाकरे सरकारवर टीका केली. आरक्षणाच्या मुद्द्यावर आधीच वातावरण तापलं असताना आता फडणवीस आणि शरद पवारांच्या भेटीमध्ये नेमकी काय चर्चा झाली, हे पाहणं महत्त्वाचं आहे. तर, ही फक्त सदिच्छा भेट असल्याचं देवेंद्र फडणवीस यांनी ट्वीट करत म्हटलं आहे. शरद पवार यांच्या प्रकृतीची विचारपूस करण्यासाठी ही भेट झाली असल्याचं बोललं जात आहे. पण असं असलं तरी या दोन्ही बड्या नेत्यांमध्ये आरक्षणाच्या मुद्द्यावरही चर्चा झाली असल्याचं सूत्रांचं म्हणणं आहे. आता एकीकडे मुंबईत मेट्रोच्या भूमिपूजनाचं काम सुरू आहे. कार्यक्रमाला देवेंद्र फडणवीसांना कोणतंही आमंत्रण देण्यात आलं नाही, पण प्रविण दरेकरांना आमंत्रण पाठवण्यात आलं होतं. यामुळे कुठे नाराजीचा सूर आहे का? यावरूनही दबक्या आवाजात राजकीय चर्चा सुरू आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3c5vPU0
