औरंगाबाद : लसीकरणाच्या मोहीमेचा वेग वाढावा म्हणून औरंगाबाद जिल्हा प्रशासन वेगवेगळ्या पद्धतीने मोहीम राबवत आहे. त्याचबरोबर काही कठोर निर्णय सुद्धा प्रशासनाकडून घेतले जात आहे. त्यातच आता जिल्हाधिकारी सुनील चव्हाण यांनी शाळा आणि महाविद्यालयीन विद्यार्थ्यांसाठी नवीन आदेश दिले आहे. न केलेल्या विद्यार्थ्यांना दर सात दिवसांनी कोरोना चाचणी करणे बंधनकारक असणार असल्याची माहिती जिल्हाधिकारी सुनील चव्हाण यांनी दिली आहे. जिल्हाधिकारी कार्यालयात जिल्हा आपत्ती व्यवस्थापन प्राधिकरण समितीची गुरुवारी बैठक पार पडली. या बैठकीत जिल्हाधिकारी सुनील चव्हाण बोलताना म्हणाले की, "Omicron या विषाणुची प्रसारक्षमता लक्षात घेता त्याचा संसर्ग रोखण्यासाठी उपाययोजनेचा एक भाग म्हणून, यापुढे सर्व महाविद्यालयांनी त्यांचे प्राध्यापक, शिक्षक, शिक्षकेत्तर कर्मचारी आणि सर्व विद्यार्थ्यांचे लसीकरण झाले आहे याबाबतची खात्री करावी." तसेच यापुढे लसीकरण न केलेल्या विद्यार्थ्यांना दर सात दिवसांनी कोरोना चाचणी करणे बंधनकारक असणार आहे. पहिला डोस घेणाऱ्या विद्यार्थ्यांना 15 दिवसांनी आणि दोन डोस घेणाऱ्या विद्यार्थ्यांना 1 महिन्याला कोरोना चाचणी करणे बंधनकारक आहे, अशी माहिती जिल्हाधिकारी चव्हाण यांनी दिली आहे. औरंगाबाद महापालिका हद्दीतील शाळा 15 डिसेंबरनंतर सुरु होणार? औरंगाबाद महानगरपालिका क्षेत्राअंतर्गत येणाऱ्या पहिली ते सातवीपर्यंतच्या शाळा सुरू करण्याबाबतचा निर्णय पुन्हा एकदा पुढे ढकलण्यात आला आहे. औरंगाबाद महानगरपालिका आयुक्त अस्तिक कुमार पांडे यांनी याबाबत माहिती दिली असून, 15 डिसेंबरनंतर परिस्थिती पाहून शाळा सुरु करण्याबाबतचा निर्णय घेतला जाईल, असं पांडे म्हणाले आहेत. राज्यात 1 डिसेंबरपासून पहिली ते चौथीच्या शाळा सुरु करण्याचा निर्णय शासनाने घेतला होता. मात्र ओमिक्रॉनचा धोका लक्षात घेत औरंगाबाद महानगरपालिकेने 1 डिसेंबरऐवजी 10 डिसेंबरनंतर शाळा सुरू करण्याचा निर्णय घेतला होता. त्यामुळे आता शाळा सुरू करायच्या की नाही याबाबत आज बैठक होणार होती. मात्र आता शाळा सुरू करण्याबाबतचा निर्णय आणखी पुढे ढकलण्यात आला असून, 15 डिसेंबरनंतर निर्णय घेतला जाणार आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3DO4mBq
