: सासूच्या सांगण्यावरून पतीने मुलगाच हवा म्हणून ठराविक वेळेत शरीरसंबंध ठेवले आणि इतरवेळी राक्षसी पद्धतीने अनैसर्गिक अत्याचार केला, असा आरोप करत एका विवाहितेनं तक्रार दिल्यानंतर विजापूर नाका पोलीस ठाण्यात पती, सासू, सासरा, दोन नणंदा व पतीच्या आते भावाविरुद्ध गुन्हा दाखल करण्यात आला आहे. () मिळालेल्या माहितीनुसार, सदर विवाहितेचं २०२० मध्ये सोलापुरातील एका युवकाशी लग्न झाले. या लग्नानंतर मुलगाच हवा असा अट्टहास असलेल्या सासरच्या मंडळींनी पती आणि पत्नी यांना शारीरिक संबंध प्रस्थापित करण्यासाठी निश्चित वेळा ठरवून दिल्या. अमावस्या-पौर्णिमेला किचनमध्येच झोपण्याची सक्ती केली. शिवाय या वेळापत्रकात बदल झाल्यावर गर्भपात केला. पतीने ठराविक दिवशी संबंध ठेवण्याची सक्ती केली, तर इतर दिवशी अनैसर्गिक व राक्षसी शरीरसंबंध ठेवले. तेव्हा या अनैसर्गिक अत्याचाराला विरोध केल्याने पतीने मारहाण केली व माहेरील व्यक्‍तींना मारण्याची धमकीही दिली. याबाबत सासू, सासऱ्याला सांगितल्यानंतर त्यांनी, मुलगा होण्यासाठी ते रास्तच असल्याचं सांगून गप्प बसवलं. मुलगा व्हावा म्हणून सासूच्या सांगण्यावरुन पती ठराविक दिवशीच शारीरिक संबंध ठेवत होता. त्यातून पीडितेला शारीरिक इजादेखील झाली आहे. विवाह झाल्यापासून एक वर्ष पतीने अत्याचार केला आणि तब्येत खालावल्यानंतर सासरच्यांनी मे २०२० मध्ये माहेरी सोडले. आता सासरची मंडळी पतीचा दुसरा विवाह लावून देऊन मला घटस्फोट मागत असल्याची तक्रारीवरून विजापूर नाका पोलिसांत गुन्हा दाखल झाला आहे. दरम्यान, या प्रकरणी पुढील तपास विजापूर नाका पोलीस करत आहेत.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/30IMolY
