पुणेः करोना संसर्गाची तीव्रता कमी होत नाही तोच पुणे जिल्ह्यातील पुरंदर तालुक्यातील बेलसरमध्ये झिका विषाणूचा रुग्ण आढला आहे. बेलसरच्या आजूबाजूच्या ७९ गावांवर झिका व्हायरसचा प्रादुर्भाव झाल्याची शंका व्यक्त करण्यात आल्यानं खळबळ माजली आहे. आरोग्य प्रशासनानं या परिसरात अलर्ट जारी केलं आहे. पुण्यातील बेलसर गावातील ५० वर्षीय महिलेला झिका व्हायरसची लागण झाली होती. त्यानंतर राज्य सरकारने तातडीचे पावलं उचलच राज्यात मार्गदर्शक सूचना जारी केल्या होत्या. केंद्र सरकारच्या आरोग्य पथकानंही बेलसर गावात जाऊन पाहणी केली होती. तसच, एनआयव्हीच्या तज्ज्ञांसोबत बैठकही आयोजित केली होती. पुणे जिल्ह्यातील ७९ गावांत झिका व्हायरसचा प्रादुर्भाव झाल्याची शक्यता आहे. या गावांत अलर्ट जारी केली आहे. तसंच, स्थानिक प्रशासन व सर्व ग्रामपंचायत यांना खबरदारी घेण्याचे आदेश देण्यात आले आहे. जिल्हाधिकारी राजेश देशमुख यांनी या गावांची यादीही जाहीर केली आहे. या ७९ गावांत मागील तीन वर्षांपासून डेंग्यू, चिकनगुनियाचे रुग्ण आढळले आहेत. ही गावे झिका व्हायरससाठी अति संवेदनशील आहेत. त्यामुळं गावातील लोक व अधिकाऱ्यांना अलर्ट राहण्याच्या सूचना देण्यात आल्या आहेत. झिका व्हायरसचा प्रादुर्भाव टाळण्यासाठी आरोग्य प्रशासनानं कंबर कसली आहे. केंद्र सरकारच्या पथकानंही पुण्यात भेट दिली होती. तसंच, गावातून १८ लोकांच्या रक्ताचे नमुने घेण्यात आले आहे. या लोकांमध्ये डेंग्यू, चिकनगुनिया ही लक्षणे होती. त्या रुग्णांचे अहवाल अजून आले नाहीत. काय आहे? झिका विषाणूचा संसर्ग हा डासांच्या एडीज प्रजातीद्वारे पसरतो. एडीज डासांमुळं डेंग्यू आणि चिकनगुनिया विषाणू देखील पसरतात. पण हा आजार जीवघेणा नाही. मात्र, तीन महिन्यांच्या गरोदर महिलेस हा संसर्ग झाल्यास बाळामध्ये व्यंग येण्याची शक्यता असते. बाळांमध्ये मायक्रोसेफॅली हा दुर्मिळ दोष निर्माण होऊ शकतो. या बाळांचं डोकं जन्माच्या वेळी लहान असू शकतं. झिका व्हायरसची लक्षणे? झिका व्हायरसमुळं ८० टक्के रुग्णांमध्ये कोणतीही लक्षणे आढळून येत नाहीत. तर, इतर, रुग्णांमध्ये ताप, अंगदुखी, डोळे येणे, अंगावर पुरळ उठणे, सांधेदुखी अशी लक्षणे आढळतात. डास चावल्यानंतर साधारणतः आठवड्यानंतर झिका व्हायरसची लक्षणे आढळून येतात.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3lJ7itA
