सांगली : एमपीएससी आयोगावरील रिक्त सदस्यांच्या जागा भरण्यासाठी उपमुख्यमंत्री अजित पवार यांनी ३१ जुलै पूर्वी राज्यपालांकडे यादी पाठवली आहे. विधान परिषदेच्या त्या बारा आमदारांची ही यादी नसल्याने त्याला लवकरच मान्यता मिळेल असा विश्वास आहे. असे ट्विट आमदार रोहित पवार यांनी केले होते. मात्र, राज्य सरकारकडून प्रत्यक्षात दोन ऑगस्ट रोजी यादी राज्यपालांच्या कार्यालयाला मिळाली असल्याचा दावा आमदार गोपीचंद पडळकर यांनी केला आहे. पवार कुटुंबीयांनी लबाडीचे लिमिट क्रॉस केल्याची खरमरीत टीका आमदार पडळकर यांनी केली आहे. एमपीएससी आयोगावरील सदस्यांच्या रिक्त जागा भरण्यासह एमपीएससीच्या परीक्षा रखडल्याचा मुद्द्यावरून आमदार गोपीचंद पडळकर यांनी चार दिवसांपूर्वीच उपमुख्यमंत्री अजित पवार यांच्यावर जोरदार टीका केली होती. यानंतर रिक्त सदस्यांच्या जागा भरण्याची प्रक्रिया सुरू असल्याचे स्पष्टीकरण उपमुख्यमंत्र्यांनी दिले होते. आमदार रोहित पवार यांनी याबाबत एक ट्विट करून उपमुख्यमंत्री अजित पवार हे शब्द पाळणारे नेते असल्याचे म्हटले आहे. एमपीएससी आयोगाच्या रिक्त सदस्यांच्या जागा भरण्यासाठी ३१ जुलै पूर्वीच राज्यपालांकडे यादी पाठवली आहे. विधान परिषदेच्या त्या १२ आमदारांची ही यादी नसल्याने याला लवकरच मान्यता मिळेल, असा विश्वासही त्यांनी व्यक्त केला होता. आमदार रोहित पवार यांच्या ट्विटवर आमदार पडळकर यांनी आक्षेप घेतला आहे. ते म्हणाले, पवार कुटुंबीयांची लबाडी संपूर्ण राज्याला माहितीची आहे. एमपीएससी आयोगावरील सदस्यांच्या रिक्त जागा भरण्यासाठी ३१ जुलै पूर्वीच राज्यपालांच्या कार्यालयात यादी पाठवल्याचे ट्विट रोहित पवार यांनी केले आहे. प्रत्यक्षात मात्र दोन ऑगस्टला ही यादी राज्यपाल कार्यालयाला प्राप्त झाली आहे. यावरून पुन्हा एकदा पवार कुटुंबीयांची लबाडी स्पष्ट झाली आहे. यांनी लबाडीचे लिमिट क्रॉस केले आहे. पडळकर यांच्या या आरोपामुळे पुन्हा एकदा रोहित पवार आणि पडळकर आमने-सामने आले आहेत.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3jn0Qp7
