यवतमाळ : तीन वर्षीय चिमुकल्याला फाशी देऊन वडिलांनी स्वत:ही गळफास घेऊन आत्महत्या केल्याची धक्कादायक घटना समोर आली आहे. ही घटना गुरुवारी रात्री अकरा वाजता दरम्यान यवतमाळ तालुक्यातील मंगरुळ साखर कारखाना येथे घडली. या घटनेने परिसरात हळहळ व्यक्त केली जात आहे. संजय शिवाजी उईके (वय २९, रा. मंगरुळ), संयोग संजय उईके (वय ३), अशी मृत बापलेकांची नावे आहेत. गेल्या वर्षी मृतक संजयचा मुलगा संदीप याचा अपघाती मृत्यू झाला होता. त्यामुळे उईके कुटुंब दु:खातच जीवन जगत होते. संजय उईकेची पत्नी काही दिवसांपूर्वी माहेरी गेली होती. सासूरवाडी येथे जाऊन संजय हा मुलगा संयोग याला घेऊन आला होता. गुरुवारी रात्री चिमुकल्या मुलाला फाशी देऊन संपविले. त्यानंतर अवघ्या काही वेळात स्वत:ही गळफास घेऊन आत्महत्या केली. या घटनेची माहिती मिळताच यवतमाळ ग्रामीण पोलिसांनी घटनास्थळ गाठून पंचनामा केला. पोलिसांनी दोघांचेही मृतदेह शवविच्छेदनासाठी वैद्यकीय महाविद्यालयात पाठविले. या प्रकरणी मृताची पत्नी मनीषा संजय उईके हिने यवतमाळ ग्रामीण पोलिस ठाण्यात तक्रार दिली. त्यावरून मृताविरुद्घ खुनाचा गुन्हा नोंदविण्यात आला आहे. कौटुंबिक कारणातून हे टोकाचे पाऊल उचलल्याची माहिती पोलिस सूत्रांनी दिली. पुढील तपास ठाणेदार किशोर जुनघरे यांच्या मार्गदर्शनात करण्यात येत आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/2Wb4t9P
