फरार किरण गोसावीला अटक होणार?; पुणे पोलिसांचे पथक लखनऊला रवाना

पुणेः ड्रग्ज केस (aryan khan case)संदर्भात गेल्या काही दिवसांपासून रोज नवनवीन खुलासे होत आहेत. या प्रकरणातील मुख्य साक्षीदार प्रभाकर साईल (Prabhakar sail)यांच्या गौप्यस्फोटानंतर या प्रकरणातील दुसरे साक्षीदार किरण गोसावी (K.P. Gosavi) पुन्हा एकदा चर्चेत आला आहे. किरण गोसावी हा लखनऊमध्ये असल्याचं सांगण्यात येत आहे. तसंच. गोसावीला ताब्यात घेण्यासाठी पुणे पोलिसांचे एक पथक लखनऊला रवाना झालं आहे. प्रभाकर साईल यांनी या प्रकरणात गौप्यस्फोट केल्यानंतर सोमवारी किरण गोसावी यांची एक व्हायरल ऑडिओ क्लिप समोर आली होती. त्यात तो लखनऊ पोलिसांना सरेंडर व्हायचं असल्याचं म्हणत आहे. तर, पोलीस अधिकाऱ्यांनी त्याला सरेंडर करुन घेण्यास स्पष्टपणे नकार दिला होता. गोसावी लखनऊमध्ये असल्याचं समजताच पुणे पोलिसांचे एक पथक लखनऊला रवाना झाल्याची माहिती आहे. आर्यन खान प्रकरणात साक्षीदार राहिलेल्या किरण गोसावीवर पुण्यात एका प्रकरणात गुन्हा दाखल आहे. गोसावी विरोधात फसवणूक प्रकरणात त्यांच्याविरोधात तक्रार दाखल करण्यात आली होती. या फसवणूकीच्या तक्रारीबाबतही काल गोसावीनं प्रतिक्रिया दिली होती. झ्याविरुद्ध पुण्यात एक जुनी तक्रार आहे. त्याची अचानक चौकशी सुरू करण्यात आली आहे. माझा शोध घेतला जात आहे. माझ्या जीवाला धोका आहे. मला जेलमध्ये टाकून ठार मारण्याची धमकी देण्यात आली आहे, असा दावाही गोसावी याने केला आहे. प्रभाकर साईलचा दावा काय? पंच साक्षीदार म्हणून कोऱ्या कागदावर सह्या घेतल्या, असा गौप्यस्फोट प्रभाकर साईलने केला होता. तसंच, आर्यन खावला सोडवण्यासाठी शाहरुखकडे २५ कोटींची मागणी करण्यात आली. किरण गोसावी शाहरुखची मॅनेजर पूजा ददलानीच्या संपर्कात होते, असा दावा प्रभाकर साईलनं केला आहे. किरण गोसावी काय म्हणला? मी यांना ओळखत नाही. मी केवळ टीव्हीवरच त्यांना पाहिलं आहे. ६ ऑक्टोबरनंतर त्यांच्याशी माझे बोलणे झालेले नाही. याआधी एनसीबीच्या कोणत्याही कारवाईत माझा सहभाग राहिलेला नाही. ड्रग्ज पार्टी प्रकरणी कारवाई झाली. त्यात सर्व गोष्टी वाचल्यानंतरच मी पंचनाम्यावर स्वाक्षरी केली', असा दावा किरण गोसावी याने केला. आर्यन खानचा फोन जप्त करण्यात आला होता. त्याच्याकडे फोन नव्हता. त्यामुळेच मॅनेजरला किंवा आईवडिलांना फोन लावून देण्याची विनंती त्याने मला केली. आर्यनने मला मॅनेजर पूजा यांचा नंबर दिला. फोन लागला पण त्यांनी फोन उचलला नाही. त्यानंतर सॅम नावाच्या व्यक्तीचा फोन आला. मला नंबर द्या मी फोन लावतो असे तो म्हणाला, असं किरण गोसावी यांनी म्हटलं आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2XLdk3b