म. टा. वृत्तसेवा, कल्याणः तोकडे कपडे घातल्याबाबत जाब विचारत हाजी मलंगच्या पायथ्याशी फिरण्यासाठी गेलेल्या दोन तरुण व दोन तरुणींना तेथील सहा तरुणांनी रविवारी संध्याकाळी बेदम मारहाण केली होती. तसेच या तरुणींचे कपडे फाडण्याचा प्रयत्न करत विनयभंगही केला होता. आपल्यासोबत अघटित होऊ शकते याची कल्पना आल्यानंतर या चौघांनी कशीबशी स्वतःची सुटका करून घेत पोलिस ठाणे गाठले. मात्र वैद्यकीय चाचणी अनिवार्य असल्याचे व हे प्रकरण आपल्या हद्दीत येत नसल्याचे सांगत पोलिसांनी त्यांची दखल घेतली नव्हती. परंतु यातील या तरुणीने हिंमत दाखवत सोशल मीडियावरून या घटनेला वाचा फोडताच पोलिसांनी मंगळवारी संध्याकाळी उशिरा याप्रकरणी गुन्हा नोंदवत आरोपींचा शोध सुरू केला आहे. डोंबिवली पूर्वेकडील पलावा सिटी येथे राहणारा डॉ. चेतन राठोड आपल्या मित्र-मैत्रिणींसह गडाच्या पायथ्याशी रविवारी संध्याकाळी ४.३० वाजता फिरण्यासाठी गेला होता. याठिकाणी फोटो काढत असताना मद्यधुंद अवस्थेतील १५ ते २५ वयोगटातील तरुणांनी चेतनच्या मैत्रिणींनी तोकडे कपडे घातल्याबाबत जाब विचारत शिवीगाळ केली. तसेच लाकडी दांडके व हातातील दारूच्या बाटल्यांनी त्यांना मारहाण केली. यानंतर यातील काहींनी या तरुणींचे कपडे फाडण्याचा प्रयत्न केला. मात्र प्रसंगावधान राखत त्यांनी दुचाकीवरून पळ काढल्याने त्यांची सुटका झाली. या घटनेनंतर या चौघांनी पोलिसांत तक्रार नोंदवण्याचा प्रयत्न केला. मात्र पोलिसांनी वैद्यकीय चाचणी करून या, हे प्रकरण आमच्या हद्दीत नाही, अशी कारणे देत तक्रार नोंदवून घेण्यास नकार दिला. इंस्टाग्रामवर पोस्टनंतर पोलिसांना जाग पीडित तरुणांनी घडलेल्या प्रकाराबाबत इंस्टाग्रामवर पोस्ट टाकून मुंबई पोलिस आयुक्त, ठाणे पोलिस आयुक्त आणि पर्यावरणमंत्री आदित्य ठाकरे यांना टॅग करत न्यायाची मागणी केली. त्यानंतर जागे झालेल्या पोलिसांनी याप्रकरणी हिल लाइन पोलिस ठाण्यात अज्ञात आरोपींविरोधात गुन्हा दाखल केला. याबाबत पोलिसांशी संपर्क साधला असता, त्यांनी अधिक तपास सुरू असल्याचे सांगण्यात आले.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3ijE9mu
