म. टा. वृत्तसेवा, गंगापूररोडः गंगापूर गाव शिवारातील शिवाजीनगर भागात अल्पवयीन मुलांच्या हाणामारीत एकाचा पाझर तलावात बुडून मुदत्तफिर मेकवाणी या मुलाचा मृत्यू झाल्याची दुर्दैवी घटना बुधवारी (दि. २७) घडली. पोलिसांनी दिलेल्या माहितीनुसार, शिवाजीनगर भागातील एका इंग्रजी माध्यमाच्या शाळेतील संबंधित मुलांचा जुना वाद होता. या वादात मध्यस्थी करण्यासाठी मुदत्तफिर मेकवाणी याने मित्राच्या मोबाइलवरून तिघांना पाझर तलावावर बोलावून घेतले. मुदत्तफिर याच्या समवेत त्याचे दोन सहकारी होते. वाद मिटविताना तो आणखी उफाळून आल्याने त्यांच्यात हाणामारी सुरू झाली. यात मुदत्तफिर जवळच असलेल्या पाझर तलावाच्या पाण्यात पडला. मात्र, त्याला पोहता न आल्याने तो बुडाला. त्यात त्याचा मृत्यू झाला. घटनेची माहिती मिळताच गंगापूर पोलिस स्टेशनचे वरिष्ठ पोलिस निरीक्षक रियाज शेख सहकाऱ्यांसह घटनास्थळी दाखल झाले. यावेळी स्थानिक नगरसेवक दिनकर पाटील यांनीही या पाझर तलावाबाबत पोलिसांना माहिती दिली. त्यांनी अग्निशमन दलालाही कळविले. अग्निशमन दल व पट्टीच्या पोहणाऱ्यांनी पाण्यात बुडालेल्या मुलाचा मृतदेह बाहेर काढला. पोलिस उपायुक्त दीपाली खन्ना, अमोल तांबे यांनी घटनास्थळी भेट देऊन माहिती घेतली. बांधकाम व्यावसायिक विष्णू पाटील यांनी पाझर तलाव परिसरात लावलेल्या सीसीटीव्हीतील फुटेजची तपासणी केली. यात मुलांची आपसात हाणामारी झाल्याचे दिसून आले. या प्रकरणातील मुलांना पोलिसांनी ताब्यात घेतले असून, त्यांनी सदर मुलाचे नाव मुदत्तफिर मेकवाणी असल्याचे सांगितले. अधिक तपास पोलिस उपनिरीक्षक शेनकर करीत आहेत. चौकी आहे, पोलिस नाही पाझर तलाव परिसरात अल्पवयीन मुलांचा नेहमी वावर असतो. मात्र, याकडे गंगापूर पोलिसांकडून दुर्लक्ष केले जाते. तलावापासून पाचशे मीटर अंतरावर नगरसेवक पाटील यांनी स्वखर्चातून पोलिस चौकी दिली आहे. परंतु, पोलिस चौकीत नेमणूक करण्यात आलेले अधिकारी व कर्मचारी उपस्थित राहत नाहीत. यामुळे पाझर तलावावर टवाळखोर येथे उच्छाद मांडतात. स्थानिक बांधकाम व्यावसायिकाने येथे ठिकठिकाणी 'नो सेल्फी झोन' असे फलक लावले आहेत. सीसीटीव्ही यंत्रणाही स्वखर्चाने दिली आहे. या फलकांचेही टवाळखोरांकडून नुकसान केले जाते. पोलिसांनी येथे गस्त वाढवावी, अशी मागणी केली जात आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3GrpHTz
