मुंबई: आर्यन खान ड्रग्ज प्रकरणातील कारवाई बोगस असल्याचा आरोप करणारे व एनसीबीचे मुंबई विभागीय संचालक समीर वानखेडे यांच्यावर वसुलीचे आरोप करणारे राष्ट्रवादी काँग्रेसचे प्रवक्ते व राज्याचे अल्पसंख्याक मंत्री नवाब मलिक यांनी आज नवा गौप्यस्फोट केला आहे. मलिक यांनी दोन ट्वीट करत वानखेडे यांच्या कथित घोटाळ्याचे पुरावे सादर केले आहेत. नवाब मलिक यांनी समीर वानखेडे यांचा लग्नातील फोटो ट्विटरवर शेअर केला आहे. 'पहचान कौन' असं मलिक यांनी वानखेडे यांचे फोटो शेअर करताना म्हटलं आहे. त्या पाठोपाठ मलिक यांनी समीर वानखेडे यांचं जातप्रमाणपत्र सोशल मीडियावर शेअर केलं आहे. 'इथूनच सुरू झाली सगळी घोटाळेबाजी' असं मलिक यांनी वानखेडे यांच्या जातप्रमाणपत्राचा संदर्भ देत म्हटलं आहे. मलिक यांनी प्रसिद्धीस दिलेल्या पत्रकात प्रथमच वानखेडे यांचा 'समीर दाऊद वानखेडे' असा पूर्ण उल्लेख केला आहे. वानखेडे यांनी गैरप्रकार करून नोकरी मिळवली आहे, असा आरोप मलिक यांनी केला आहे. कार्डेलिया क्रूझवरील ड्रग्ज पार्टी प्रकरण उजेडात आल्यापासून नवाब मलिक यांनी एनसीबी विशेषत: समीर वानखेडे यांना सातत्यानं लक्ष्य केलं आहे. वानखेडे हे भाजपच्या काही नेत्यांच्या सांगण्यावरून बॉलिवूडला त्रास देत असल्याचा आरोप मलिक यांनी यापूर्वीच केला आहे. राज्यातील महाविकास आघाडी सरकारला बदनाम करण्यासाठी हे सगळं सुरू आहे. एखाद्या कारवाईच्या आधी वानखेडे हेच मीडियाला माहिती देत असतात. हव्या त्या बातम्या पेरून लोकांची बदनामी केली जाते. त्यानंतर त्यांच्याकडून वसुली केली जाते, असा आरोप मलिक यांनी केला आहे. वानखेडे यांची नोकरी घालवल्याशिवाय व त्यांना तुरुंगात टाकल्याशिवाय थांबणार नाही, असा इशाराही मलिक यांनी दिला आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/3Bc8dqn
