: जळगाव महापालिकेतील भाजपच्या सत्तेला सुरुंग लावल्यानंतर आता भाजपच्या बंडखोरांनी महापालिकेच्या प्रभाग समिती सभापतीपदाच्या निवडणुकीत चारही जागांवर विजय मिळवला आहे. बंडखोरांमुळे प्रभाग समित्याही गमवाव्या लागल्याने भाजपची चांगलीच अडचण झाली आहे. सोमवारी महापालिकेत ऑनलाईन पद्धतीने प्रभाग समित्यांच्या सभापतीपदाची निवडणूक पार पडली. यावेळी प्रभाग समिती १ मध्ये प्रा.सचिन पाटील यांची बिनविरोध तर प्रभाग २ मध्ये प्रविण कोल्हे, प्रभाग समिती ३ मध्ये रेखा पाटील तर प्रभाग समिती ४ मध्ये शेख हसीना या विजयी ठरल्या. जळगाव महापालिकेच्या दुसऱ्या मजल्यावरील सभागृहात जिल्हाधिकारी तथा पीठासीन अधिकारी अभिजीत राऊत यांच्या उपस्थितीत ही निवडणूक प्रक्रिया पार पडली. यावेळी अतिरीक्त आयुक्त विद्या गायकवाड व नगरसचिव सुनील गोराणे आदी उपस्थित होते. प्रभाग समिती क्रमांक १ मध्ये प्रा.सचिन पाटील यांच्या व्यतिरिक्त एकही अर्ज दाखल झाला नसल्याने त्यांची बिनविरोध निवड करण्यात आली. प्रभाग समिती क्रमांक २ मध्ये बंडखोरांकडून प्रवीण कोल्हे तर भाजपकडून मुकुंदा सोनवणे यांना उमेदवारी देण्यात आली होती. या जागेसाठी झालेल्या मतदानात प्रवीण कोल्हे यांना १३ तर मुकूंदा सोनवणे यांनी ७ मते मिळाली. सोनवणे यांचा ६ मतांनी पराभव करत, प्रवीण कोल्हे विजयी ठरले. प्रभाग क्रमांक ३ मध्ये एका जागेसाठी चार अर्ज दाखल झाले होते. त्यामुळे या समितीमध्ये काट्याची लढत होईल अशी शक्यता होती. मात्र, एमआयएमच्या शेख सईदा व सुन्ना बी देशमुख यांचे अर्ज बाद ठरल्यामुळे भाजपचे उमेदवार धीरज सोनवणे व बंडखोरांच्या उमेदवार रेखा पाटील यांच्यात लढत झाली. यामध्ये एमआयएमच्या तिन्ही नगरसेवकांनी भाजप बंडखोर उमेदवार रेखा पाटील यांना मतदान केल्यामुळे रेखा पाटील यांनी धीरज सोनवणे यांचा अवघ्या एका मताने पराभव केला. प्रभाग समिती ४ मध्ये देखील सरळ लढत झाली. याठिकाणी भाजपने उषा पाटील तर भाजप बंडखोरांकडून शेख हसीना यांना संधी देण्यात आली होती. शेख हसीना यांना १० तर उषा पाटील यांना ६ मते मिळाली. दरम्यान, निवडणुकीआधी भाजपच्या बंडखोरांनी नियुक्त केलेले गटनेते ॲड.दिलीप पोकळे व उपगटनेते चेतन सनकत यांनी भाजपच्या सर्व नगरसेवकांना व्हीप बजावून भाजपच्या बंडखोरांना मतदान करण्याचा सूचना दिल्या होत्या. मात्र, भाजपने हा व्हीप अनधिकृत असल्याचे सांगत हा व्हीप धुडकावून लावत भाजपच्याच उमेदवारांना मतदान केले, मात्र तरीही भाजपच्या पदरी अपयशच आले.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times https://ift.tt/36vTOIP
